اليوم موضوعي شوي بعيد عن دروس الكمبيوتر و جذي اليوم ودي اسولف شوي عن نقطة اشوفها بحياتي
كل واحد فينا عنده شي يحبه سواء كان هواية او شي يتابعه او شي عنده معلومات كبيره عنه من مختلف الاشياء سيارات مكياج كمبيوترات حيوانات ... و جذي
فأكيد بتكون طبيعة سوالفك عن هالشي وايد و راح يعكس عند الناس انطباع انك انت متعلق بهل الشي فيذكرونك فيه
بتكلم عن نفسي انا احب الكمبيوترات من ناحية البرامج و كلش خبرتي بالهاردوير قليلة بس مبنية على كلام الناس الي يفهمون بهل السوالف وايد
فلما أحد ايي يسألني تعرف حق هالشغلة مثلاً انقل ملفات من هالكمبيوتر لي هالكمبيوتر بالنيتوورك او فورمات او حماية او او او.. اكون عارف لاني حايس بهل الشي
بس لما ايي يسألني ابي كمبيوتر يديد شاخذ او يقولي شرايك بهذا زين ما اعرف اجاوبه اعطيه رؤوس اقلام اقوله رامات شكلها زينه بروسسير ولا ما ادري بس جنه زين بس لو تبي اسألك
شالي خله الناس تسإلك عن هالشغلات اهو انه انت تسولف وايد عن هالشغلات بس وين المشكلة انك انت تسولف تسولف ساعات تندمج و تخليي الي جدامك يضيع تلقاه يهز راسه يسوي روحه فاهم او يسرح لوول
دايماً يقولون لي اختصر علشان نفهم يبوني اقولهم مثل انه السيارة تدوس بانزين تمشي ما يبون يعرفون شلون صارت العملية الي خلتها تتحرك
عاد لما تقعد تسولف حق اكثر من شخص و ما ينتبه لك لانه مو ميوله تحاول تتفاده تسولف وياه بهل الشغلات ولو انه صعب لانه مو بسهولة الانسان يغير طبع موجود فيه
خل انيي حق الناس الي تفهم بهل الشغلات و فيه من ميولك و لو انهم قليلين صدقوني حتى الي يدرسون نفس تخصصي كمبيوتر ساينس مو كلهم حابين التخصص بعضهم انجبروا و بعضهم داشين و انصدموا بالدراسة، شوي طلعت عن الموضوع تلقه الي نفس ميولك مهتم شوي بعيد عن اهتمامك انت يعني مثلاً انا احب ماكونتوش اهو يحب لينكس و جذي بس هذا ما يمنع انه فيه شي مشترك بسوالف ولو انه مو فاهمك اميه بالاميه بس احياناً تنقلب انه ينرفزك ما يقتنع
يعني انا ما احب الناس الي يعبد الشي لا وندز احسن شي او ايفون احسن شي انت جرب كل شي و شوف كل شي له ميزاته و عيوبه، انا احب أبل لكن صدمني ايفون فور اس مافيه زود بالهاردوير لو اسوي له جيل بريك الرامات بتنوكل وكال بمعنى اخر لو مثلاً تبطل برامج ثقيلة جي بي اس و خمس العاب ثقيله و تترس صفحات السفاري جهازك بهنق نظرياً هالحجي مستنتجه لانه الرامات اهي الذاكرة الي تشتغل عليها البرامج
فضطريت اني افكر احول اندرويد ولو اني كنت اكرها لانه تقليد للايفون بس لازم شوي اصير متحرر بالعقل و اختار جهاز يناسبني من ناحية هاردوير علشان لما اتعبث فيه بالسوفتوير يتحمل الطيب الي بطلعه من عيونه لوول
قبل جم يوم دشيت الام اي ار سي بيني و بينكم احس غلطت عمري اني تعلمت على هالبرنامج انا تعلمته بعمر صغير ١٢ سنة او ١٣ سنة شي جذي و كانوا اغلب الي فيه كلش مو قدي اكبر مني بثلاث اربع سنين
و الحين انا بدش ٢١ سنة اكيد الي فيه طقت ٢٤ سنة و طالع دشيت و سألت شباب فيه احد يفهم بالاوبجيكتف سي لغة برمجة تصميم برامج ايفون قاعد اقره كتب و اتعلم بس فيه شغلة مضيعتني فقلت جود احصل مهندس كمبيوتر او احد مهتم شي موجود، سألت بالعامية رد عليي واحد قال ما اظن انه فيه ناس مهتمين بهل الشي ولو فيه مهتمين جان دش موسوعة قينيس
بط جبدي كلامه شفيه كويتي و يطنز على المبرمجين الكويتيين جنه اهو الفلته قلت له فيه ناس تبرمج شالمشكلة قال هاذول ميانين احسن لهم يديرون بالهم على عيونهم و ظهرهم ما احب سوالف البرمجة ولا ابي اتعلمها المهم كان اسلوبه نفس ويها لو برد عليه ارد عليه يا باسلوب يعلمه شلون يكلم الاوادم او اسلوب اوصخ من اسلوبه بكل بساطه سكت و حقرته بكل بساطه ماله داعي اعور راسي وياه او اني غصب طيب اقنع ناس بشي احبه لانه اصعب شي بالدنيا ارضي كل الناس ، يمكن الي قهرني انه ما هقيت الام اي ار سي لي الحين فيه ناس ما عندهم احترام
هالاشكال تعطيك شعور ودك تتعلم كل شي ادز له تورجان تخليه يتبطل من غير لا يحس و تعفس كمبيوتره تعفس و تقوله بعدين ها مصر على كلامك انه مافي كويتين يفهمون بالكمبيوتر ؟
انا شفت اجانب اصغر مني و افهم مني لابعد الحدود بالكمبيوتر يعني تخيل اكو مايكل شوماخر اصغر منك و يسوق سيارة احسن منك هل راح تغار و تقول لا الا بصير احسن منه ؟ ولا راح تقول اذا اهو ناجح انا خل اكون ناجح مثله بمجال السيايير بس من ناحية ثانية اني الغم سيارة مثلاً او يكون عندي خبرة قريبة من خبرته
انا أؤمن انه لو كنت تحب شي من كل قلبك و تعبت علشانه سويت كل شي علشان تنمي بداخلك راح تلقه الناس تعطيك اهتمام حق الشي الي تحبه اكثر من قبل و اهي من نفسها تبي تسمعك تسولف عن الشي
يعني الحين ستيف جوبز لما طلع أجهزة أبل و اشتغل عليها و فكر لدرجة الجنون ما خله الناس تحبه ، و علشان لا يزعلون الحبايب الي يكرهون ستيف بيل قيتس لما قعد يبرمج على ورق و يسوي كمبيوتر قبل لا يدش اي بي ام و باق فكرة القرافيك يوزر انترفيس من ستيف و طلع نفسه كل هذا الي سواه و تعب خله الناس تحبه
كلنا عندنا احلام و كلنا نقول الكلام اسهل من الفعل لكن تذكروا انه وراء كل انسان ناجح تجربة خلته يوصل حق النجاح
;) نشوفكم على خير
